Gundersen Lutheran - Tus Neeg Nrhiav Kev Kho Mob tej Cai thiab tej Kev Lav Ris

Tus Neeg Nrhiav Kev Kho Mob tej Cai thiab tej Kev Lav Ris

Nyob ntawm Gundersen Lutheran peb lub hom phiaj yog kom saib xyuas thiab tu koj.
Peb lub hom phiaj yog saib koj rau nqi ua ib tug neeg thiab pom tias koj muaj cai txais kev kho mob uas phim koj tej kev li kev cai.

Tus Neeg Nrhiav Kev Kho Mob tej Kev Cai
Ua ib tug neeg nrhiav kev kho mob los ntawm Gundersen Lutheran, peb pom zoo rau koj txoj cai:

Txais tej kev ceev koj tej khoom thiab tej ntaub ntawv xov xwm cia kom leej twg lam tau lam pom tsis tau li thiab tej kev kho mob uas phim koj tej kev ntseeg thiab tej yam koj saib rau nqi.
Txais Gundersen Lutheran ib daim ntawv Ceeb Toom Hais txog Kev Ceev Ntaub Ntawv Tsis Pub Qhia rau Lwm Tus (Notice of Privacy Practices).
Txais tej kev kho mob tsim nyog thiab raws caij tshaj plaws txawm hais tias koj yog haiv neeg twg, muaj tawv nqaij xim dab tsi, tuaj lub teb chaws twg tuaj, ntseeg txoj kev ntseeg dab tsi, yog poj niam los yog txiv neej, muaj hnub nyoog li cas, xiam hoob khab los yog siv tej nyiaj pab dab tsi kom them nqi kho mob los xij peem. Tag nrho cov neeg nrhiav kev kho mob muaj vaj huam sib luag rau ntawm txoj kev kho mob txawm hais tias lawv muaj pab kas phais duav nqi kho mob los tsis muaj. Tsis muaj dab tsi ntxias cov kws kho mob saib ib tug neeg nrhiav kev mob uas muaj pab kas phais duav nqi kho mob rau nqi siab dua ib tug neeg nrhiav kev kho mob uas tsis muaj.
Kom koj tus kws kho mob thiab lwm tus neeg kho mob piav saib koj tus mob zoo li cas tiag thiab yuav mob ntev li cas, saib lawv npaj siab li cas kom thiaj kho tau thiab saib yuav muaj li cas thaum kawg, kom koj to taub zoo.
Txais tej ntaub ntawv xov xwm thiab tej kev pab kom tsis hnov mob los ntawm cov neeg kho mob uas saib xyuas tej kev pab kom tsis hnov mob.
Txais tej kev kho mob hauv ib qho chaw puag ncig uas puaj phais, tsis muaj leej twg tsim txom los sis hais tias yuav ua phem rau koj.
Paub lub npe thiab txoj hauj lwm ntawm tag nrho cov neeg uas saib xyuas thiab tu koj. Koj muaj cai txais tej ntaub ntawv xov xwm hais txog saib peb lub tsev kho mob nrog lwm lub tsev kho mob los sis koom haum qhia ntawv sib koom tes li cas yog tias qhov ntawd tseem ceeb rau txoj kev kho koj tus mob.
Koom peb rau ntawm txoj kev npaj thiab nruab txoj kev saib xyuas thiab tu koj. Koj muaj cai pab txiav txim siab txog txoj kev saib xyuas thiab tu koj ua ntej thiab thaum tseem tab tom kho koj tus mob, koj muaj cai tsis kam txais ib txoj kev kho mob los yog ib txoj kev saib xyuas thiab tu koj twg yog tias ua li ntawd tsis txhaum kev cai lij choj los sis lub tsev kho mob tej kev cai, thiab koj muaj cai kawm saib yog tias koj tsis kam txais kev kho mob li hais no yuav muaj li cas rau koj txoj kev noj qab nyob zoo. Tsis muaj dab tsi ntxias cov kws kho mob kom lawv xaj tej kev kuaj ntshav los yog kuaj mob lwm yam ntxiv uas yuav tsis txim nyog ua los yog qhia cov neeg nrhiav kev kho mob rau lwm qhov chaw pab kho mob ntxiv. Yog tias koj tsis kam txais ib txoj kev kho mob twg, koj tsis muaj cai txais lwm txoj kev kho mob thiab lwm txoj kev pab uas tsim nyog uas Gundersen Lutheran muaj los yog koj muaj cai pauv mus rau lwm lub tsev kho mob los tau thiab.
Yuav tsis raug yuam nyob koj ib leeg xwb los yog raug khi tsuas yog thaum yuav tsum ua li ntawd kom koj thiaj puaj phais los yog kom lwm tus neeg nyob puaj phais tau thiaj ua li ntawd xwb.
Sau tej ntaub ntawv npaj rau tej kev txiav txim siab txog txoj kev kho mob nyob rau yav tom ntej thiab kom tsim tej ntaub ntawv xws li ib daim ntawv tso cai rau ib tug neeg hais lus sawv cev rau koj thaum koj hais tsis taus lus lawm (living will, healthcare proxy, los sis durable power of attorney). Gundersen Lutheran saib tej ntaub ntawv uas sau tseg li no lawm (advance directives) rau nqi heev yog tias ua li ntawd tsis txhaum kev cai lij choj los sis lub tsev kho mob tej kev cai.
Tso siab tias tag nrho tej kev sib txuas lus thiab tej ntaub ntawv xov xwm uas hais txog txoj kev saib xyuas thiab tu koj yuav muab ceev cia kom leej twg lam tau lam pom tsis tau li, tsuas yog thaum tseem fwv teb chaws los sis tseem fwv xeev tej kev cai cia peb los yog hais kom peb muab rau lwm tus neeg saib xwb thiaj li tsis muaj li no. Koj muaj cai tso siab tias Gundersen Lutheran yuav qhia cov neeg uas nws muab koj cov ntaub ntawv rau kom lawv paub hais tias tseem ceeb kom ceev koj cov ntaub ntawv xov xwm no cia zoo. Thaum twg koj thov kom tau li no, ib tug neeg kho mob yuav piav txog koj cov ntaub ntawv xov xwm rau koj. Tsis tas li ntawd xwb, koj muaj cai xyuas koj cov ntaub ntawv xov xwm thiab kom peb luam koj cov ntaub ntawv xov xwm no rau koj, tsuas yog koj yuav tsum them cov nqi luam ntawv uas peb yuav tau raws li kev cai xwb.
Tso siab tias koj yuav txais kev kho mob thaum twg tsim nyog thiab koj muaj cai kom cov kws kho mob thiab lwm cov neeg kho mob qhia koj saib muaj tej kev kho mob dab tsi thiab saib cov kev kho mob twg thiaj zoo rau koj. Nyob ntawm Gundersen Lutheran, tej kev txiav txim siab hais txog tej kev kho mob nyob ntawm saib tus neeg nrhiav kev kho mob xav tau tej kev pab li cas.
Muaj koj ib tug xib hwb qhia Vajtswv txoj lus los sis koj ib tug txiv neeb tuaj xyuas koj thiab coj ua tej kev pab ntawm sab ntsuj plig.
Kom cov neeg saib xyuas thiab tu koj saib koj tej kev xav txog kev mob kev nkeeg rau nqi txawm yog koj xav li cas ntawm lub paj hlwb, sab ntsuj plig, los yog yus haiv neeg tej kev li kev cai los los xij peem.
Txais ntaub ntawv xov xwm hais txog Gundersen Lutheran tej khoos kas cob qhia. Ua ib qho chaw uas ua ib lub hauv paus tsev qhia kev kho mob peb cob qhia cov kws kho mob, cov nai maum thiab lwm tus neeg kho mob uas yuav pab saib xyuas thiab tu koj thiab.
Tsuas yog thaum muaj kam ceev thiaj li tsis muaj li no xwb, tiam sis koj muaj cai hais tias koj pom zoo los sis tus neeg sawv cev rau koj raws kev cai hais tias nws pom zoo rau txoj kev kho mob ua ntej pib kho.
Pom zoo rau kev koom los sis hais tias koj tsis kam koom tej kev ntsuam xyuas los sis tej kev kuaj tib neeg hais txog txoj kev saib xyuas thiab tu koj thiab txoj kev kho koj tus mob los sis rau qhov uas lawv yuav siv koj kom ntsuam xyuas thiab kuaj li hais no, thiab koj muaj cai kom cov kws kho mob piav txog tej kev ntsuam xyuas no ua ntej koj pom zoo rau. Txawm hais tias ib tug neeg nrhiav kev kho mob tsis kam koom tej kev ntsuam xyuas los sis tej kev kuaj no los nws tseem txais tau tej kev kho mob uas tsim nyog txais uas Gundersen Lutheran muaj.
Txais koj ib daim nqi kho mob (bill) ua ke nrog ib co lus piav txog tej nqi uas nyob hauv thiab saib yuav muaj li cas yog tias koj tsis them koj tus nqi kho mob thiab ib co ntaub ntawv hais txog tej kev pab nyiaj them nqi kho mob.
Kawm txog tej kev cai thiab tej kev xyaum ua uas raug rau txoj kev saib xyuas thiab tu ib tug neeg nrhiav kev kho mob, kev kho mob thiab kev lav ris.
Pauv koj qhov pab kas phais duav nqi kho mob.
Txais tej kev pab hais txog tej kev sib txuas lus raws li qhov zoo tshaj (xws li, siv ib daim ntawv sau sib txuas lus/kev piav tes kom thiaj nrog cov neeg nrhiav kev kho mob sib txuas lus uas lag ntseg/hais tsis tau lus zoo, siv kev txhais lus rau cov neeg nrhiav kev kho mob uas tsis txawj hais lus As Kiv, tauj mus)
Kawm txog Gundersen Lutheran txoj kev tswj hwm tej nqi rau cov neeg nrhiav kev kho mob thiab txoj kev ua kom tej khoom qub ntawm kev kho mob uas yuav muab pov tseg tsawg dua dhau los ntawm txoj kev rov qab siv tej khoom ntawd. Qhov no kuj suav qhov uas rov qab siv tej khoom uas feem ntau “siv ib zaug xwb.” Txhua qhov khoom uas rov qab siv li no peb ntxuav kom huv, kuaj, thiab ua kom tsis muaj kab mob los sis ua kom huv huv dawb paug raws li tseem fwv teb chaws tej kev li kev cai.

Tus Neeg Nrhiav Kev Kho Mob tej Kev Lav Ris
Ua ib tug neeg nrhiav kev kho mob rau ntawm Gundersen Lutheran, koj muaj kev lav ris kom:

Noog lus noog thiab nrhiav kom tau ntaub ntawv xov xwm ntxiv txog koj txoj kev noj qab nyob zoo los sis txoj kev kho koj tus mob thaum koj tsis nkag siab tag nrho tej ntaub ntawv xov xwm los sis cov lus qhia. Qhov uas koj to taub txog koj tej teeb meem ntawm kev noj qab nyob zoo tseem ceeb heev rau txoj kev kho koj tus mob kom zoo. Yog tias koj tsis to taub dab tsi, cia li noog koj tus kws kho mob los sis lwm tus neeg txog qhov uas koj tsis to taub ntawd.
Ua raws li lub tsev kho mob tej kev cai tag nrho thiab tej yam uas ib tug neeg nrhiav kev kho mob yuav tsum ua tag nrho.
Ua tib zoo paub tseeb hais tias Gundersen Lutheran muaj koj ib daim ntawv tso cai rau ib tug neeg hais lus sawv cev rau koj thaum koj hais tsis taus lus lawm (advance directive), yog tias koj sau tau ib daim cia.
Txawj xav txog lwm tus neeg nrhiav kev kho mob thiab cov neeg kho mob tej cai thiab saib lub tsev kho mob tej khoom ntiag tug rau nqi, thiab hais kom cov neeg uas tuaj xyuas koj ua ib yam nkaus li.
Qhia koj cov ntaub ntawv xov xwm tag nrho thiab tseeb tseeb rau peb hais txog tej kev mob kev nkeeg uas koj twb muaj lawm yav tas los, tej lub sij hawm koj tau pw tsev kho mob, tej tshuaj uas koj twb noj lawm los sis tseem noj tam sim no thiab lwm yam uas tseem ceeb rau koj txoj kev noj qab nyob zoo.
Pab peb pab koj rov qab zoo mob zoo nkeeg thaum koj ua raws li peb cov lus qhia koj. Koj lav hais tias koj yuav qhia cov neeg uas saib xyuas thiab tu koj saib koj puas ua tau raws li ib txoj kev kho mob twg los tsis tau.
Sib tham nrog cov neeg uas pab kho koj tus mob hais txog tej tshuaj koj noj tau kom tsis hnov mob thiab hais txog ib txoj kev saib xyuas thiab tu koj.
Pom tias tej yam koj ua hauv koj lub neej raug rau koj txoj kev noj qab nyob zoo li cas.
Tiv tauj Gundersen Lutheran Social Services rau ntawm (608) 775-3454 yog tias toob kas tej kev pab hauv tsev los sis tej kev nyob tom tsev laus.
Muab tej ntaub ntawv tso cai rau Gundersen Lutheran kom peb thiaj li muab tau koj cov ntawv nqi kho mob thiab lwm cov ntaub ntawv xov xwm rau tseem fwv thiab lwm tus neeg pab them nqi kho mob. Tsuas yog tias txoj kev cai lij choj hais tias koj tsis tas them xwb, koj kuj yuav lav ris txoj kev them nqi kev kho mob rau tej kev pab kho mob uas Gundersen Lutheran tau pab kho koj lawm.

Tej cai txuas ntxiv rau cov neeg nrhiav kev kho mob uas pw tsev kho mob:
Ua ib tug neeg nrhiav kev kho mob uas pw lub tsev kho mob, peb pom zoo rau koj txoj cai:

Kom peb qhia ib tug neeg ntawm koj tsev neeg los sis ib tug neeg sawv cev rau koj thiab koj tus kws kho mob txog qhov uas koj yuav pw tsev kho mob, tsuas yog koj hais kom peb tsis txhob ua li ntawd xwb peb thiaj tsis ua.
Qhia saib koj kheev thiab tsis kheev tus neeg twg tuaj xyuas koj thaum koj pw tsev kho mob.
Thov kom pauv mus rau lwm hoob thaum koj pw tsev kho mob yog tias lwm tus neeg nrhiav kev kho mob los sis lwm tus qhua tuaj xyuas es nrov nrov los sis lauv kuas koj.
Tsuas yog thaum muaj kam ceev thiaj li tsis muaj li no xwb, tiam sis koj muaj cai hais tias koj pom zoo los sis tus neeg sawv cev rau koj raws kev cai hais tias nws pom zoo rau txoj kev kho mob ua ntej pib kho.
Tso siab tias koj yuav txais kev kho mob thaum twg tsim nyog thiab koj muaj cai kom cov kws kho mob thiab lwm cov neeg kho mob qhia koj saib muaj tej kev kho mob dab tsi thiab saib cov kev kho mob twg thiaj zoo rau koj thaum koj pw tsev kho mob thiab thaum tsis tsim nyog lub tsev kho mob saib xyuas thiab tu koj ntxiv li lawm.
Tsuas yog thaum muaj kam ceev thiaj li tsis muaj li no xwb, tiam sis koj muaj cai kom tsis raug pauv mus rau lwm lub tsev kho mob yog tias peb tsis tau piav zoo zoo saib yog vim li cas thiaj li pauv koj mus tod thiab yog tias peb tsis tau npaj kom lub tsev kho mob tom ub txais koj tau thiab saib xyuas koj tau.
Koom ua ib tug pej xeem hauv tej hauj lwm ua pej xeem. Nov suav qhov uas koj muaj cai pov ntawv dhau ntawm txoj kev pov ntawv uas koj muab xa mus rau qhov chaw suav ntawv pov thaum koj pw tsev kho mob.

Koj muaj cai kom peb ntsuam xyuas raws li tej kev cai ncaj nees ib qho teeb meem twg uas koj muaj. Cov neeg nrhiav kev kho mob uas yuav pw tsev kho mob txawm yog ib hnub xwb (outpatient) los yog ntev dua (inpatient) kuj muaj tej cai ntxiv hais txog txoj kev qhia teeb meem tawm no. Yog tias koj xav tau ntaub ntawv xov xwm ntxiv hais txog tej cai ntawm kev qhia teeb meem tawm, tiv tauj kom tau ib tug Neeg Sawv Cev rau cov Neeg Nrhiav Kev Kho Mob rau ntawm ext. 57676. Koj kuj tiv tauj tau ib lub koom haum twg nram qab no thiab:

Tej kev pab rau kev kho tej kev txhawj xeeb:
Koj muaj cai kawm txog tej ntaub ntawv xov xwm rau txoj kev kho tej kev txhawj xeeb thiab tej kev hais tsis sib haum. Yog tias koj muaj tej kev txhawj xeeb dab tsi, thov ua raws li nram qab no ib qho twg los tau:

Hais kiag rau tus neeg uas saib xyuas thiab tu koj, los sis thov kom nrog tus nai hauv qhov chaw uas koj nyob ntawd sib tham.
Tiv tauj kom tau ib tug Neeg Sawv Cev rau cov Neeg Nrhiav Kev Kho Mob thaum koj:
- Hu tus xov tooj (608) 775-7676 los sis (800) 362-9567, ext. 57676, hnub Monday txog hnub Friday, 8 teev sawv ntxov txog 5 teev tsaus ntuj.
- Sau ntawv mus rau: Patient Representative Service Excellence Department C01-007 Gundersen Lutheran 1900 South Avenue La Crosse, WI 54601
- Sau ntawv e-mail mus rau: CRFeedback@gundluth.org
- Sau ntawv rau ib daim ntawv qhia (Comment Card) thiab rov qab muab cob rau lawv raws li hais rau hauv daim ntawv.
Hais kom tus neeg teb xov tooj hauv lub tsev kho mob tiv tauj kom tau tus Neeg Saib Xyuas lub Tsev Kho Mob yog tias koj hu tom qab 5 teev tsaus ntuj los sis thaum hnub vas xaum vas thiv thiab hnub phav.

Ua ib tug neeg nrhiav kev kho mob rau ntawm Gundersen Lutheran, koj muaj cai qhia teeb meem hais txog kev puaj phais los sis txoj kev saib xyuas thiab tu koj rau Pawg Sib Koom Tes Tso Cai rau tej Tsev Kho Mob Ua Hauj Lwm (The Joint Commission). Kom xa ib daim ntawv qhia teeb meem mus rau lawv, thov tiv tauj JCAHO rau ntawm 800-994-6610, hnub Monday txog hnub Friday, 8 teev 30 sawv ntxov txog 5 teev tsaus ntuj, lub Caij Central.

complaint@jointcommission.org

1900 South Avenue • La Crosse, WI 54601
(608) 782-7300 or (800) 362-9567
www.gundluth.org
#22334 12/06